Micheli, quilla sera di l’11 d’aprili di u 2008 di pettu à u FC Nantes, t’aviami fattu a prumessa davanti à u populu Corsu. Issu stadiu induva ci ai passatu un tempu scemu, issu stadiu induva ai stampatu u to passu, issu stadiu ch’è tù sunniavi tantu… un ghjornu issu stadiu purtaria u to nomi ! A strada hè stata longa è petricosa. Ci hè vulsutu à luttà à tempu à livellu di l’evuluzioni di u locu è à tempu à livellu spurtivu firmendu ind’a cumpetizioni. Sedici anni dopu, semi fieri è felici o Michè di dì ti chì ci semi ghjunti. U stadiu François Coty divintarà u stadiu Michel Moretti à partasi da u 31 di marzu di u 2024. Sedici anni dopu à a to sparizioni. Un simbulu pà noi tutti, un attu maiò à prò di a to mimoria. Da quassù sapemi ch’è tù ci fighjuli è spiremi ch’è tù sia fieru di noi. À tè, puntellu di a nostra squadra, cusì impignatu, chì hà tracciatu u solcu di u rinnovu. In lu 2007, duranti a prisintazioni di u to prughjettu avii dichjaratu tandu chì issu cartulari era a più bella vittoria dopu à quindici anni passati quì. Emi suvitatu u to passu, emi vintu a to partita è demi oghji à issu stadiu u nomi ch’ellu si meriti : u stadiu Michel Moretti. Chì tutti quilli chì purtarani i nostri culori è chì marchjarani à nantu à issi lochi siani à l’altezza di a to immensità.
O Michè, u to ricordu ferma sempri in i nostri menti... è à partasi d’oghji, u to nomi sarà stampatu in sempiternu in u locu induva ai scrittu una parti maiò di a storia di l’ACA, chì hè dinò a toia.
