Pà a staghjoni chì veni, u nostru club sarà unu di i partinarii di u famosu ghjocu di televisiò chì faci onori à a lingua è a cultura corsa. Natu in lu 2017 annantu à Via Stella, l’emissioni Sapientoni hè u prima ghjocu di u canali corsu. Un’emissioni par tutti induv’ellu si ridi è s’impara assai, chì addunisci tutti i generazioni. I candidati rispondini à parechji dumandi di cultura generali sopra à a Corsica, u Mediterraniu è u mondu sanu ! Dui squadri di trè ghjucadori chì par vincia, devini risponda à a lestra à tutti i dumandi di i cinqui provi di a partita.
Quist’annu, u ghjocu hè prisintatu da dui artisti di prima trinca. Prima ci hè Marie-Ange Geronimi, chì ghjoca è travaglia dipoi anni è anni incù a cumpagnia U Teatrinu purtata da Guy Cimino. U so surrisu, a so simpatia incù i candidati è i spettatori è po i so qualità di cumidianti dani à I Sapientoni tutti i culori d’un bellu divertimentu. Truvemu, à fiancu à ella, à Paulu Antoni Squarcini di u Teatru Nustrali, ghjovanu portabandera di a lingua corsa, chì poni i quistioni è arricchisci l’emissioni incù u so sapè.
U club parmittarà à ogni squadra di guadagna i piazzi pà i scontri in Timizolu ! Marcuri u 29 d’aostu scorsu, i ghjovani ghjucadori bianchi è rossi t’ani avutu a furtuna d’essa in lu publicu di l’arrighjistramenti di i prima emissioni è parechji squadri ACA ci andarani par ghjucà. Steti à fiancu à noi da cunnoscia i dati di diffusioni.
