Bella prumessa pà a seguita !

S’attacca bè ! Pà u prima scontru di ‘ssa staghjoni di Domino’s Ligue 2, l’Aiaccini ani surpresu tutti i sustinidori Bianchi è Rossi. Malgradu un marcatu chì hè principatu tardi è una squadra ch’ùn s’era mai vista cù ghjucadori novi com’è Gaëtan Courtet, Cyrille Bayala è Matthieu Huard, l’ACA 2019-2020 hà fattu piacè à tutti ! È comu ! À a 5a minuta di a partita, Courtet sirvutu di manera divina da Coutadeur marca cù putenza u so prima but pà a squadra di l’Orsu ! Tutta a squadra hà ghjucatu binissimu duranti i 45 prima minuti di ghjocu. I sustinidori, belli numarosi, sò stati incantati da i qualità di Bayala chì hè forti è lestru ; u spiritu guerrieru di Matthieu Huard, i passi magnifichi di i mitichi Coutadeur è Cavalli, a forza di Cédric Avinel è di Benjamin Leroy o allora u travagliu assai seriu di Kévin Leujeune chì ghjucava pà a prima volta com’è laterali drittu. A sulidarità è l’intillighjenza in lu ghjocu di l’ACA li permetti d’essa à 1-0 à a fini di a prima parti.

À u principiu di u sicondu tempu, a squadra t’hà a pussibulità di marcanni un sicondu dopu à una bella passa di Bayala à Johan Cavalli chì par disgrazia tira accantu. Dopu à quista, Kévin Lejeune è Jérémy Choplin si dani di rimenu in difesa da cuntena l’assalti nurmandi. U guardianu Benjamin Leroy sarà ancu custrettu à lampassi trà i pedi di Jamal Thiaré : penalty pà u HAC chì sarà trasfurmatu da Kadewere chì và à pruvucà i sustinidori aiaccini in tribuna Faedda fendu i listessi gesti cà un certu Mateta … 1-1 (72’). À a 76esima minuta, u listessu ghjucadori marca dinò (1-2). Par furtuna, l’intrata di Matteo Tramoni hà da cambià l’affari. In la so prima corsa, u ghjuvanottu hè arristatu da un ghjucadori di u HAC chì u faci cascà in l’aghja di riparazioni. Gaëtan Courtet faci un passucciu in daretu, tira è marca ! Ùn hè cà ghjustizia vistu u bellu ghjocu chì l’Orsi ani praticatu sta sera 2-2 (85’). À a fini di u scontru, a squadra miritava ancu un sicondu penalty.