Stu vennari u 29 d’aprili, a sera di u scontru ACA-Châteauroux à u stadiu François Coty, quattru zitelli è i so famigli sarani quì pà veda a partita lanciata da u picculu Jean-Joseph chì ni tuccarà u prima ballò.
Sarà l’occasioni par elli d’incuraghjiscia i ghjucadori di l’ACA chì t’ani incù elli unu di i so babbucci : Jérémy Choplin.
L'associu 1 maillot pour la vie
Dà u surrisu à zitelli malati incù l’aiutu di più di 7000 spurtivi d’altu nivellu : eccu u scopu di l’associu « 1 maillot pour la vie » natu in lu 2000 in Toulouse. In 19 anni di vita, st’associu hà fattu scuntrassi millai di zitelli uspitalizati è spurtivi chì s’impegnani di cori pà falli sminticà a malatia è i guai di tutti i ghjorni, u tempu di trè ori o d’una duminicata.
Sta bella cullaburazioni trà u nostru numaru 24 è « 1 maillot pour la vie » hè nata 11 anni fà in Rodez attempu à l’amicizia trà u ghjucadori è Christophe Warluzel, membru di st’associu ch’avia aiutatu u so figliolu è chì hà dicisu di fanni parti ellu dinò da renda à d’altri zitelli tuttu u sustegnu ch’ellu avia ricivutu.
Hè cusì chì Christophe Warluzel chì sarà quì vennari sera incù i chjuchi suvita sempri à Jérémy è organizeghja tutti l’anni scontri trà ellu è i zitelli. A ci dici Christophe : « Jérémy hè un amicu è un tippettu chì faci assai pà l’associu. Pà disgrazia, a malatia pò tuccà à tutti è chì c’hè di più bellu cà un zitellu chì surridi ? Sò cuntenti di vena quì in Aiacciu è di rializà sogni di zitelli ind’una stonda di festa è d’aligria ».
Una bellissima storia ch’ellu ci conta dinò Jérémy Choplin « In tutti i squadri induv’e sò passatu, aghju sempri accoltu un zitellu incù u so babbu pà dui o trè ghjorni incù una partita à a fini. Sò sempri belli stondi è li scambia l’idei à sti zitelli chì li facciu scopra u mondu prufiziunali, u stadiu, i nostri lochi di vita : hè sempri una campa pà elli è li faci assai belli ricordi ».
Stu vennari, sarani zitelli di u spidali d’Aiacciu chì t’avarani u piacè di sparta sti mumenti di gioia intornu à un scontru di i nostri Bianchi è Rossi.
