L'ACA primu di u campiunatu!

A c’avia ditta Olivier Pantaloni. Avia da essa una partita difficiuli sta sera pà l’Aiaccini in Timizolu (13esima ghjurnata di Domino’s Ligue 2). A squadra di Rodez chì hè cullata quist’annu, cù risultati bunissimi dipoi u principiu di a staghjoni, hà mustratu i so valori da i prima minuti di u ghjocu. Prima, i Bianchi è Rossi ani ritinutu ‘ssa squadra prima di metta in piazza u so ghjocu è di sviluppallu. Annantu à un tarrenu più bellu cà pà l’ultimi scontri, l’Orsi si sò fatti valè annantu à una bella penalità tirata da vicinu da Coutadeur ma u tiru di Laci hè statu arristatu da u guardianu annantu à a ligna (11’°). Trè minuti dopu, Tramoni faci un bellu centru ma u ballò hè cuntratu da a difesa. Cyrille Bayala cerca à marcà cù u pedi mancu. U ballò passa accantu à u palu (19’). Ma quandu Benjamin Leroy faci una surtita in li pedi d’un attaccanti, l’arbitru mostra tandu u puntu di penalty (26’). Ma si pudia cuntà annantu à u nostru purtieri ! Dopu à avè arristatu un penalty in Sochaux, u guardianu aiaccinu si lampa da u cantu chì ci vò è salva tutta a so squadra cù grazia è putenza. (26’). Purtati da i so sustinidori, a squadra parti à l’assaltu di u but. Dopu à un’azzioni iniziata da Coutadeur chì ghjoca incù Courtet, Bayala pensa d’avè marcatu lampendusi à vita persa ma u ballò hè statu cuntratu da a trasversali (35’°). À a fini di a prima parti, i dui squadri sò à paru. Pigliarà a suprana quilla chì saparà essa a più pricisa.

A siconda parti cumencia cù una vulintà ancu più forti è più palesa ind’è l’Aiaccini. Tutti i ghjucadori facini i sforzi pà ripiglià ogni ballò è metta a difesa di Rodez in piriculu. Sforzi ch’ani da essa ricumpinsati à a 55’ minuta di ghjocu quandu Qazim Laci apprufitta d’una passa di Cyrille Bayala ch’imprissiuneghja à tutti cù tutta l’energia ch’ellu metti in la partita. Laci sciacca una cannunata è u ballò faci trimà i reti : hè cusì chì l’ACA piglia a suprana (1-0). Olivier Pantaloni faci dui cambiamenti , Tramoni è Cuypers, bunissimi sta sera annantu à u tarrenu sò rimpiazzati da Mendes è Jallow. Trè minuti nanzu à a fini di u macciu, annantu à una penalità vicina di Coutadeur… Jallow ripiglia u ballò… ma tira accantu... Benjamin Leroy faci un antru arrestu magnificu à l’89esima minuta cù u pugnu ! Par avà, a squadra piglia a prima piazza di u campiunatu aspittendu u scontru Lens-Lorient. Una billissima vittoria pà una squadra chì hè stata bunissima è sciaccamanata cù forza da i so sustinidori.