L'intrinori Olivier Pantaloni ci dà u so sintimu dopu à a bella vittoria di a so squadra sta sera in Timizolu contru à Valenciennes :
' Eramu pronti pà un macciu difficiuli contru à una bella squadra di Valenciennes. Cunnisciamu u statu di u tarrenu. U nostru avantaghju era d’avè dighjà ghjucatu annantu è di sapè comu fà pà disturballi. Dopu à avè missu in piazza u nostru ghjocu cù ballò longhi, assai generosità è assai duelli vinti, mi pari logica a nostra vittoria. Emu sappiutu prufittà di i so sbagli è emu missu in opara tuttu u nostru travagliu annantu à i corners chì hà pagatu. Piccatu chì no ùn fussimu micca riisciuti à marcà un terzu but. Ma possu dì chì i me ghjucadori ani fattu una billissima partita. Era impurtanti di vincia sta sera pà piglià i forzi nanzu à un scontru impurtanti contru à Lorient è emu da fà tuttu ciò chì ci vò par andà à fà un bellu risultatu.'
