ACA-VAFC (2-0) : una vittoria chì faci prò!

U scontru principia bè pà i nostri Orsi cù parechji belli occasioni in li prima minuti com’è i ripresi di Bayala è po di Tramoni chì tirarà dinò ghjustu sopra à a gabbia di Prior è po u tiru cruciatu di Laci chì passa accantu. Ancu sì l’Orsi t’ani quantunqua a suprana in lu ghjocu, a squadra di Valenciennes si sà mustrà assai priculosa incù una vitezza in li contri abbastanza imprissiunanti com’ellu l’avia privista Olivier Pantaloni. Ritinaremu par isempiu u tiru di Guillaume à a 7esima minuta, u stucciu di Chergui annantu à u palu o u tiru di u listessu ghjucadori à a 28esima. Dopu à parechji provi, ci vurrà à aspittà a 32’ è un corner pà veda u billissimu tiru di Mathieu Coutadeur sviatu da Hugo Cuypers chì marca una prima volta ! L’ACA cuntinueghja à attaccà è à a 41’, u ghjovanu Cuypers, d’un tiru putenti marca u sicondu but di a partita ! Si compii a prima prima parti incù un bellu risultatu da tena fin’è a fini.

A siconda parti principia cù un but di Bayala signalatu for di ghjocu à a 46’, ciò chì sarà dinò u casu à l’82esima minuta. Belli occasioni aiaccini ci ni sarà assai com’è u bellu tiru di Laci chì passa sopra (50’), u centru di Kalulu pà Courtet impiditu da a difesa (57’). Com’è in lu prima parti, u VAFC hè sempri priculosu cù i so contri è parechji azzioni ma a difesa aiaccina faci un bellu travagliu quant’è u nostru gurdianu Benjamin Leroy chì faci arresti magnifichi à a 63’ è salvendu i soi di manera incridibuli à l’80esima minuta. Ancu sì u VAFC cuntinueghja à attaccà è cerca sempri à andà in davanti, ùn si contani più l’azzioni aiaccini assai numarosi com’è tutti i provi putenti di Bayala chì pà sfurtuna ùn sarà micca ricumpinsatu, l’incapata di Jallow, u tiru di u capitanu Coutadeur chì paria indrentu è po u tiru putenti d’Huard arristatu. I nostri Orsi sarani riisciuti à tena ‘ssu bellu risultatu incù maistria ! Bravi !