Dopu à una bella vittoria for di casa contru à Le Mans (2-4), Olivier Pantaloni ci dici ciò ch’ellu aspetta di i so ghjucadori prima di riceva à Valenciennes vennari sera à 8 ori in Timizolu.
V’hà fattu prò par appruntà a seguita sta vittoria contru à Le Mans ?
Bella sicura ! À dilla franca, dopu à u risultatu à paru contru à Orléans, à u MMArena ci semu andati pà vincia. Ùn si pudia micca accittà un antru risultatu cà quissu. Dopu à u prima but ch’emu presu, emu riagitu più cà bè. Avà, sì no vulemu vincia astri partiti, c’hà da vulè à essa assai più forti daretu in difesa.
Comu l’apprunteti u scontru di vennari chì veni di pettu à Valenciennes ?
Hè una billissima squadra ch’ùn piglia guasgi micca buts. Sò assai boni in difesa cù ‘ssa capacità di riparta in davanti assai à a lestra ! Poni essa numarosi annantu à i contri è rimettasi guasgi subitu in piazza pà difenda.
Chì ci hà da vulè à fà pà fà una bella partita ?
Ci tuccarà à essa i patroni di u ghjocu è essa sempri attenti in difesa, ciò chì c’hè mancatu un pocu duranti l’ultimu scontru. Essa sempri serii è ghjucà cù putenza !
