L’ACA hà fattu onori à Etienne Sansonnetti è Jean-Jean Marcialis

AC Ajaccio

Etienne Sansonnetti è Jean-Jean Marcialis veghjani pà sempri annantu à Timizolu ! U nostru duettu miticu è storicu hè stampatu oramai in cori di a tribuna Jean-Baptiste Poli. L’affrescu, fattu incù l’aiutu priziosu di l’Amicali di l’Anziani ghjucadori di l’ACA hè degnu di a putenza di i dui parsunaghji storichi.

Luni dopumeziornu, u prisidenti Léon Luciani è l’Amicali di l’Anziani ani avutu l’onori di prisintà l’affrescu à i famigli Sansonnetti è Marcialis ma dinò à a stampa isulana. Tutti aviani rispostu à a chjama di l’Amicali di l’Anziani di l’ACA chì hà purtatu incù passioni stu prughjettu magnificu. Una bella stonda di spartera hè stata organizata cù a prisenza di parechji parsunaghji storichi di u club è di l’artistu Fabrice Martinez, autori di l’opara.

Un duettu miticu chì hà battutu a squadra di Francia

A pittura hè stata fatta à parta da u veru ritrattu d’un scontru di u duettu miticu. U 14 d’aprili 1968, l’ACA accuglia i Girondins di Bordeaux à u stadiu Jean-Lluis. L’ACA hà vintu 3-0 incù dui buts d’Etienne Sansonnetti. L’attaccanti hè u ghjucadori di D1 chì hà marcatu u più in l’annu 1968 sottu à i culori di l’ACA. Una parfurmenza ch’ùn hè mai stata trapassata. Jean-Jean Marcialis, marcava è passava ; a so statura, a so classa è l’andatura di st’omu discretu faciani d’ellu una carta maestra pà a riescita di stu duettu chì hà fattu sunnià tanti Bianchi è Rossi è tant’altri Corsi.

Danie Sansonnetti ci conta: « Ci vulia à vedali sti dui quì, dui amichi chì nimu pudia spiccà. Ci diciani chì u so più bellu ricordu era d’avè battutu a Squadra di Francia incù a Squadra Corsa ». A Squadra Corsa avia vintu 2 à 0 in 1967.

Un’opara pà u populu Biancu è Rossu

I ghjucadori prufiziunali è a squadra tecnica sò vinuti à scuntrà i famigli dopu à u so intrinamentu di u dopumeziornu. A prisintazioni di l’affrescu s’hè compia incù i parolli colmi d’imuzioni di Danie Sansonnetti chì hà dittu à u Capitanu Johan Cavalli : « U più gran piacè chì vo pudeti fà à i nostri dui anziani ghjucadori hè di mantenavi in Liga 2 ».

L’AC Aiacciu ringrazia i famigli Sansonnetti è Marcialis pà a so prisenza. I membri di l’Amicali, l’amichi è partinarii ch’ani permissu di rializà stu bellu prughjettu. St’affrescu, chì si vedi surtendu da u tunellu, spiremu ch’ellu vi piaciarà. Ch’ellu dessi a forza à i nostri ghjucadori è po à tutti i generazioni di Bianchi è Rossi chì passarani pà u stadiu François Coty. V’invitemu à scopralu vennari sera pà u scontru ACA-Orléans. Ritratti: François Romei

Autres publications

Newsletter