Pà a prima volta in la so storia, l’AC Aiacciu t’hà avutu l’onori di pudè fà u so ritrattu ufficiali di a staghjoni 2019-2020 in la corti di u Palazzu Fesch – Museu di i Belli Arti d’Aiacciu. Intornu à u prisidenti Christian Leca, s’erani adduniti i ghjucadori prufiziunali, u staff spurtivu è a squadra midicali.
© AC Ajaccio
IN UN GHJUVELLU DI U PATRIMONIU D’AIACCIU
L’hà ditta u so prisidenti chì l’ACA era più cà fieru di fà di ‘ssu ghjuvellu di u patrimoniu aiaccinu u locu di u ritrattu di l’annu. « Dopu à i Ghjurnati di u Patrimoniu è a nostra azzioni pà a Bibbiuteca Fesch, c’hè parsu una bona cosa di fà a fotò ufficiali quì in la corti di u Palazzu Fesch » aghjusta Christian Leca. « L’ACA hè u club di a cità è semi filici di piglià ‘ssu ritrattu quì. » À fiancu à a famiglia Bianca è Rossa, dui eletti di a Cità d’Aiacciu c’ani fattu l’onori d’essa quì. Erani incù noi Simone Guerrini (aghjunta à a cultura) è Stéphane Vannucci (aghjuntu à u sport). C’era dinò parechji partinarii, prisenti annantu à a maglia di u club com’è u gruppu Cotal è Europcar.
UNA STONDA DI SPARTERA
C’erani dinò i riprisintanti di a Bibbiuteca è di u Palazzu Fesch ch’ani tuccatu un bichjeri incù tutta a squadra, l’impiigati di l’ACA è i fotografi. Dopu à u ritrattu, ci fù una bella stonda di spartera ! Truvareti prestu u poster annantu à u nostru situ internet. À a fini di a sirata, l’ACA hà prufittatu d’una visita privata di u museu cù l’eletti è u parsunali. L’AC Aiacciu ringrazia tutti i parsoni prisenti, a Cità d’Aiacciu, l’impiigati di u Palazzu Fesch, i so partinarii, i so ghjucadori, u so staff è po di sicuru A Casetta pà sta billissima stonda. Avà, s’aspetta una bella vittoria… Forza Aiacciu !
