Dui ghjorni nanzi à u spiazzamentu in Sochaux, l’intrinori Olivier Pantaloni ci dà i nutizii di a so squadra chì travaglia com’ellu si devi pà andà à circà unu o parechji punti à u Stadiu Bonal.
Comu si porta a squadra bianca è rossa dopu à sti trè vittorii ?
Pensu chì i ghjucadori t’ani u capu bè annantu à i spalli. Sò cuntenti, quissa hè sicura ma sò tutti cuscenti chì a strada di u mantinimentu hà da essa dinò longa è difficiuli. Ùn ci pigliemu micca pà quali no ùn semu. Emu vintu ‘ssi trè macci, hè vera, ma pà mantenasi, ci vò à piglià addinò calchì puntu pà ghjugna à 40 o 42 unità. Tandu, ci tocca à cuntinuà cù ‘ssu spiritu chì no t’emu dipoi calchì tempu.
Si pò dì chì i ghjucadori ani ritruvatu una certa sirinità ?
Sta sirinità, pà mè, veni simpliciamenti da u fattu chì no cumincemu à vincia i partiti è à piglià punti. Ci sintimu megliu annantu à u tarrenu è si pò dì ch’una squadra hè nata dipoi l’ultimi scontri.
Dopu à u macciu di Cuppa di Francia, emu cuminciatu à veda a vera squadra di l’ACA di cust’annu.
Comu l’apprunteti u scontru di vennari contru à Sochaux ?
Sochaux hè una squadra ch’avaria da essa più alta in la classifica è chì t’hà un bellu effettivu. Ancu s’ellu ci vò à rispittà st’avvirsariu, ci tocca à andà in Sochaux cù assai cunfidenza pà circà à vultà cù unipochi di punti da ‘ssu spiazzamentu. Semu capaci à rivena cù un risultatu ma par quista, ci hà da vulè à essa assai serii senza mai lintà nulla.
